كل حاجه قديمه للبيع
بقلم عز الدين خلاف
كل حاجه قديمه للبيع
بني آدمين دقه قديمه
للبيع
قيم واخلاق قديمه
للبيع
حضاره قديمه
للبيع
لوسمحتم حد فيكم
قلّي حاجه تانيه باقيه
لاجل ما نحافظ عليها
حد يرضى يبيع جواهر
والصفايح يشتريها
اي عاقل باع دماغه
بالهوَس في كل جيها ؟
اي فارس خد حصانه
سوق مواشي وحطّه فيها ؟
شيء فظيع الّي بيحصل
في الزمن ده
التطور صار .. تدهور
والمعاني
جرّدوها من هدومها ولبسوها
شِفْتِشي
صرّخت في الّي أهانها وياما قالتله
اختشي
ليه تقلّعني الحرير السندسي
والبس التوب المرقّع
بالكلام
كلمه فوشيا وكلمه قرعي وكلمه بين
الحُمُّصي والمشمشي
هوّ دا حال المعاني
والمعاني ف كل بيت
الّي ساكن ف العلالي
والّي ساكن جنب غيط
ربنا يجازي الّي ألِّف
للصبايا والشباب
الهَوَس باسم التحضّر والتمَدْين
في كتاب
كل كِلْماتُه بِتِنهج
في مراثون السراب
والحروف عمّاله تِرْمح
رايحه جايّه دون حساب
والسطور ف الوهم تِئْزَحْ
لاجل ماتسر الشباب .. المِهَيِّس والمِرَوشِن
والّي عاشق للغياب
واحنا
إحنا يكفينا التَّرَحُّم
ع الطبايع والصحاب
ليه نبيع أحسن مافينا
ليه نبيع الحب بالقسوه الدفينه
ليه نِفَرّط في الأمل
والأمل أعظم سفينه
خلّي نور الماضي يسطع
من جديد
وابني للحاضر عليه
أجمل مدينه .
ليست هناك تعليقات:
إرسال تعليق